“O Pleno acordou en outubro remitir o asunto á Fiscalía e polo que sabemos o goberno local incumpriu este acordo Plenario e como, xa advertiramos, vémonos obrigados a remitilo nós”

Betanzos, 14 de febreiro de 2015. O BNG remitiu á Fiscalía o expediente do hotel e estacionamento soterrado do ‘Complejo San Roque’. “O Pleno acordou en outubro remitir o asunto á Fiscalía e polo que sabemos o goberno local incumpriu este acordo Plenario e como, xa advertiramos, vémonos obrigados a remitilo nós”, explica o voceiro do BNG, Henrique del Río. “Nin na comisión de investigación, nin no Pleno nin nas actas da xunta de goberno figura que o alcalde cumprise coa orde da Corporación”, engade.

“Hai un informe do secretario que advirte de graves incumprimentos dos contratos de arrendamento e concesión do hotel e o estacionamento soterrado e hai uns gobernantes que son responsábeis de manter esa situación”, engade. “Cando a comisión de investigación comezou os seus traballos advertimos que se o PSOE non remitía en tres meses o asunto á Fiscalía tal e como o Pleno acordou fariámolo nós, e desde logo o BNG cumpre o que di”, asegurou o edil nacionalista.

Vémonos obrigados a remitir o asunto á Fiscalía nós porque o PSOE incumpriu o acordo do Pleno para enviar este asunto

Neste sentido, desde o BNG recordan que entre as irregularidades están os cambios de empresas que xestionaron o hotel sen que o Pleno o autorizase, o impago de impostos e da renda, subcontratas ou o propio feito de que o Concello non tramitase a licenza de apertura do establecemento e permitise que funcionase sen ela. “En todas estas cuestións a Administración municipal tiña que ter actuado e non o fixo, por algo será”, engaden desde o BNG.

“Cando o Pleno acordou remitir isto á Fiscalía e abrir a comisión de investigación o alcalde pretendeu modificar o acordo para que a comisión se dedicase a buscar a forma de cobrar as débedas da concesionaria e botar terra ao resto”, indica Del Río. “Evidentemente iso é necesario, pero o problema é moito maior porque para chegar a esa situación houbo quen non fixo o que tiña que facer para garantir os intereses da veciñanza e haberá que exixirlles responsabilidades”, engade. “O PSOE baleirou a comisión de investigación, que se limitou a analizar quen son os accionistas da concesionaria” engade. “Temos que entender con esta actitude que o goberno está a defender uns intereses que non son os da veciñanza?”, pergúntanse desde o BNG.

“Nun informe promovido polo PSOE o secretario advertiu no seu día que o Pleno tiña que trasladar as irregularidades na contratación de persoal cometidas polo PP á Fiscalía para non ser cómplice”, recordou Del Río. “Diante dunha situación similar, o lóxico será actuar do mesmo xeito”, abundou.

O voceiro do BNG, Henrique del Río, lembrou que no ano 97 o BNG votou en contra da operación que acabou co asilo en mans privadas e co polémico aparcamento soterrado da rúa Rosalía de Castro. “Ambos inmobles foron entregados a mans privadas polo PSOE por 75 anos a cambio dunha renda de 600 euros ao ano e 4 prazas de estacionamento”, recordou. “Estes son os negocios ruinosos en que meteu o PSOE ao Concello de Betanzos e á vista está como veu funcionando o complexo”, indicou.