O PP, que só destina 48 699 euros para as casas que a Xunta comprou no Casco Histórico, votou en contra de manter as axudas a particulares para rehabilitacion das súas vivendas. O BNG pedía un millón de euros para rehabilitar xa as casas que comprou a Xunta.

Betanzos, 9 de xaneiro de 2014. O BNG lamentou que o PP se negase no Parlamento de Galiza a destinar nin un só euro á recuperación do Casco Histórico de Betanzos. “O PP negouse a destinar seis millóns ás áreas de rehabilitación integral, entre as que está o noso centro histórico, e negouse tamén a destinar un millón de euros á recuperación das casas que a Xunta mercou en Betanzos”, explicou o voceiro nacionalista, Henrique del Río.

Tras a negativa dos deputados e deputadas do PP a incrementar esta cantidade, os orzamentos da Xunta só prevén para o Casco Histórico de Betanzos 48 699 euros. “Unha cantidade ridícula que non dá para amañar sequera unha destas vivendas de forma que os cartos de todas e todos sirvan á sociedade”, asegura o voceiro nacionalista. Esta cantidade xa aparecía nos orzamentos de anos anteriores, “sen que o PP movese un dedo para salvar o Casco Histórico betanceiro”.

Os nacionalistas entenden que con esta negativa “a Xunta do PP está impedindo que os particulares que teñen vontade de rehabilitar as súas casas poidan contar con axudas públicas para facelo”. Así, estaríase favorecendo que o Casco Histórico “vaia perdendo habitantes mentres que se incentiva que as vivendas queden abandonadas á especulación inmobiliaria ou convertidas en infravivendas que acarrean outras problemáticas derivadas da exclusión social”.

Ademais, segundo o BNG, “a Xunta do PP está contribuíndo activamente a esta ruína por comprar casas para deixalas caer de xeito deliberado”. “O PP fixo electoralismo con cartos públicos coa compra das vivendas do Casco Histórico, usándoas na súa campaña das municipais” recorda Del Rïo. “Prometeron a súa rehabilitación como vivendas sociais para gañar votos cos cartos de todas e todos”, censuran. “Agora estas vivendas están condenadas a caer ano tras ano porque o PP non ten a vontade política de amañalas”, lamentan.

Desde o BNG lamentan que o PP se limite a facer críticas sen achegar ningún tipo de solución, como demostra o estado das casas da Xunta. “Vender fume si, crítica destrutiva tamén, pero facer propostas non se lle dá ben á dereita”, ironizan. “Votando en contra das dúas emendas do BNG aos orzamentos que buscaban amañar o Casco Histórico está claro que o PP, á hora dos feitos, non está polo labor de recuperar o principal atractivo que ten Betanzos”, aseguran.

O PSOE pretende recuperar o estacionamento nas rúas do Casco Histórico

Para os nacionalistas, o goberno local do PSOE é tamén responsábel do deterioro do centro histórico ao permanecer “inmóbil, mirando como cae o Casco”. O BNG xa exixiu varias veces no Pleno que se doten de mobiliario urbano as rúas comerciais e ampliar os servizos no Casco Histórico para facelo atractivo para o comercio e para a convivencia veciñal.

“En contra das directrices do Plan Estratéxico do Centro Comercial Aberto de Betanzos, o PSOE planea volver a encher as rúas do Casco Histórico de vehículos estacionados” censuran desde o BNG. “En lugar de garantir a seguridade dos peóns nas rúas peonís comerciais, pretende volver vinte anos atrás e convertir o Casco Histórico do estacionamento gratuíto para a zona nova da cidade”, censuran. “Só falta xa que en lugar de reparar o firme de granito, a próxima actuación do goberno do PSOE sexa asfaltar a Rúa do Castro”, ironiza Del Río.

“Esperemos que Xunta e Deputación, que financiaron a supresión de beirarrúas e a peonalización das rúas do Casco Histórico non exixan ao Concello que devolva os cartos á vista de que semellan autoestradas”, conclúe o voceiro nacionalista.