“As bases xerais están para aplicalas, se non o van facer estanse rindo dos veciños e veciñas e só facendo unha manobra para lavar a cara”.

Betanzos, 25 de abril de 2013. O BNG cuestionou que o goberno local do PSOE tardase dous meses en convocar a comisión especial que o Pleno creou a proposta dos nacionalistas para elaborar as bases de contratación de persoal municipal. “O PSOE estivo dous anos mareando a perdiz e perdendo o tempo neste tema porque non ten intención ningunha de cambiar o seu modo de actuar”, denuncia o voceiro do BNG, Henrique del Río.

“A proba de que non atenden o que se lles di é que a proposta que presentan hoxe ten as mesmas ilegalidades que o BNG denunciou xa en outubro”, aseguran desde o BNG. Advirten ao executivo do PSOE que “aínda que veñan a esta comisión representantes do persoal municipal, non supón que se poidan saltar a obriga legal de negociar na mesa xeral de negociación”. Os nacionalistas recordan que o PSOE xa evitou varias veces a negociación co persoal municipal, polo que entenden que “este goberno é incapaz de negociar con ninguén, nin negocia cos grupos da Corporación nin negocia co persoal municipal”.

“Se o goberno local do PSOE se puxo coas bases de contratación foi pola cantidade de veces que o BNG denunciou as súas formas á hora de contratar persoal”, recorda o voceiro do BNG. “O PSOE pretendía facer as súas bases aprobándoas por decreto, escondendo o asunto da xente e os empregados municipais, e tiveron que ceder porque os presionamos”, indicou.

A pesar da xuntanza de hoxe, os nacionalistas entenden que “é tontería aprobar unhas bases se o goberno local vai seguir negándose a suplir aos traballadores aínda con informes a favor”. “Como no caso da praza baleira na policía local, que o PSOE non a cubre” indica Del Río. “Non entendemos daquela para que aprobar unhas bases”, ironiza.

“Ou o goberno cumpre as bases, corrixe as irregularidades que ten a súa proposta ou isto no fondo quedará, como o PSOE pretende, nun paripé para escenificar un diálogo que non é tal”, advirte. “Por iso leva dous anos dándolle voltas ao asunto sen tomar decisións e contratando á xente facendo bases a medida”, explicou. “Ou contratando os servizos públicos de forma irregular a empresas privadas”, engadiu.

“Se o PSOE non tiña a máis mínima intención de aprobar no Pleno unhas novas bases, excusaba apoiar as mocións que presentamos nese sentido”, indicou o nacionalista. “As bases xerais están para aplicalas, se non o van facer estanse rindo dos veciños e veciñas e só facendo unha manobra para lavar a cara”, conclúe.