“É sintomático que ao PSOE lle levase catro meses decidirse a crear esta comisión para defender á veciñanza de Betanzos fronte aos abusos da banca. Dá boa proba do escaso interese que tiña o PSOE no tema e de cales son as súas prioridades”.

Betanzos, 18 de marzo de 2013. O BNG celebrou que o goberno local do PSOE “por fin” convocase a comisión municipal contra os desafiuzamentos logo de que o Pleno, a iniciativa dos nacionalistas, acordara creala no mes de novembro de 2012.

“É sintomático que ao PSOE lle levase catro meses decidirse a crear esta comisión para defender á veciñanza de Betanzos fronte aos abusos da banca”, indicou o voceiro do BNG, “dá boa proba do escaso interese que tiña o PSOE no tema e de cales son as súas prioridades”. O BNG desexa que “este primeiro paso non chegue demasiado tarde” e anunciou que fará o posíbel “para evitar que o PSOE reduza a comisión a un paripé como habitualmente fai e pulará por facela útil para a veciñanza”.

“Temos constancia de que xa houbo algunha tentativa de desafiuzamento en Betanzos desde que se decidiu crear esta comisión”, indicou o voceiro do BNG, Henrique del Río. “E a asociación que conseguiu que esta muller non quedase na rúa non foi convidada polo goberno do PSOE a participar na comisión”, abundou.

"Non sabemos que criterios seguiu o goberno local para convidar a unhas entidades si e a outras non” indicaron os nacionalistas. “Xa que o goberno convocou a Cáritas ou Cruz Vermella, ben podía ter convidado tamén á Asociación Mirabal, de mulleres vítimas de violencia machista, que paralizou este desafiuzamento”, indican.

O BNG lamenta que o goberno local do PSOE faga con este problema como noutros moitos casos. “Tardan meses en cumprir cos acordos que adopta o Pleno e cando o fan é só de cara á galería e de costas á xente e as entidades implicadas realmente na solución do problema”. “Agardamos equivocarnos e que nos sorprendan cun regulamento que asegure o funcionamento da comisión”, ironizou Del Río. “O contrario demostraría que só se reúne a comisión de cara á galería e que o PSOE se reserva tomar as medidas que estime, ou neste caso non contempla, de forma unilateral”, asegurou.

Cinefórum con “Ti de quen vés sendo?” para conmemorar o Día da Muller

O BNG organiza mañá 19 de marzo un cinefórum para conmemorar o Día da Muller. Proxectarase a curta “Ti de quen vés sendo?” e haberá un coloquio conducido por Pilar Vázquez con Goretti Sanmartín, responsábel da comisión de acción feminista do Consello Nacional do BNG.