“É un tanto hipócrita que o PSOE faga unha defensa no Pleno da necesidade de manter a casa sindical e logo darlle excusa ao PP para precintala e deixar aos traballadores sen este servizo”.

Betanzos, 27 de setembro de 2013. O BNG reclamou no Pleno ao goberno local do PSOE información sobre o escrito que o Concello enviou ao ministerio de traballo e que, segundo as centrais sindicais, provocou a clausura do edificio sindical de Betanzos. “O Ministerio tapiou o edificio sen notificalo previamente aos sindicatos e deixando, polo tanto, diversa documentación dentro e sen posibilidade de acceso”, denunciou a edila nacionalista María Otero.

Os nacionalistas recordan que “o pasado 26 de febreiro, o Pleno acordaba a iniciativa do BNG reclamar ao Ministerio de Traballo a reparación do edificio sindical, que presentaba deficiencias graves na cuberta, carpintarías e iluminación, entre outras”. “Polo que desde o BNG puidemos saber, o goberno local mandou un informe ao Ministerio en virtude do cal o edificio foi tapiado”, advirten os nacionalistas.

“Dese informe e xestións o goberno local do PSOE non deu traslado ao Pleno” denuncian desde o BNG. Os nacionalistas reprochan ao equipo de goberno que “non impulsara unha xuntanza co Ministerio e as centrais sindicais usufructuarias para buscar unha solución ante a situación de deterioro do edificio”.

“Que intereses está a defender o goberno do PSOE ao deixar a Betanzos e comarca sen un servizo como o que emprestan os sindicatos e obrigando a quen precise da súa orientación, axuda ou formación a acudir á Coruña?”, pregúntanse no BNG. “É un tanto hipócrita que o PSOE faga unha defensa no Pleno da necesidade de manter a casa sindical e logo darlle excusa ao PP para precintala e deixar aos traballadores sen este servizo”, reprocha o voceiro do BNG, Henrique del Río.

Os nacionalistas aseguran que “resulta inadmisíbel ter edificios que foron construídos con cartos públicos no estado lamentábel e de progresiva ruína que presenta a casa sindical”. “En lugar de reclamar que se repararan as pequenas deficiencias que o edificio presentaba, o PSOE dálle excusa ao PP para que clausure o edificio sindical”, denuncian.

Ademais, desde o BNG cuestionáronse “porque o goberno local afirma que está facendo xestións para conseguir a cesión de parte deste local como local social dunha asociación e ao mesmo tempo provoca a clausura do edificio”.

Os nacionalistas reclaman ao goberno local do PSOE que demande do Ministerio de Traballo unha solución a esta situación “xa que os sindicatos non teñen agora un lugar onde atender as súas consultas e dar cursos en Betanzos e, ademais, temos un edificio público tapiado que dentro de nada se converterá nunha ruína”.