“Ano e medio despois daquel anuncio, que saibamos non houbo ningún tipo de proxecto ou xestións para cumprilo”.

Betanzos, 12 de xaneiro de 2015. O BNG volveu interesarse pola área de lecer canino que o goberno local do PSOE prometeu o 18 de setembro de 2013 nas inmediacións da estación do tren Betanzos-Cidade. “Ano e medio despois daquel anuncio, que saibamos non houbo ningún tipo de proxecto ou xestións para cumprilo”, explicou o voceiro nacionalista, Henrique del Río.

A pesar do compromiso público do goberno municipal do PSOE, “non hai partida nos orzamentos para este investimento nin para outros” denunciaron os nacionalistas no Pleno. No BNG cren que sendo o terreo proposto polo executivo local xa de titularidade municipal “o investimento que hai que realizar é moi modesto”.

Houbo unha recollida de sinaturas pedíndoa hai uns anos

Ano e medio despois e sen fondos para executalo, no BNG dubidan de que o PSOE realmente crera no anuncio realizado en setembro de 2013. “Existe proxecto alén da ocorrencia para ocupar un titular de prensa?” interpelou o voceiro do BNG, Henrique del Río, no Pleno. “Se existe, cando teñen pensado levalo á realidade?” abundou. Desde o BNG consideran moi pouco ético que o goberno local asumise compromisos de forma pública “con ocorrencias que xa de antemán sabían que non ían levar a cabo”.

Os nacionalistas consideran que hai demanda para construír un área de lecer para cans. “Houbo unha recollida de sinaturas pedíndoa en tempos do PP, pero non fixeron nada e o PSOE polo momento ademais de vender fume pouco fixo tamén”, explican. Desde o BNG consideran que a construción dun área como esta “ofrecerá unha alternativa para os propietarios de animais e permitirá liberar espazo en outros parques e paseos para goce das persoas”.