Del Río: “Lamentamos o voto en contra do PP defendendo o indefendíbel, en contra dos intereses da nosa cidade”

“Esperamos que o PSOE no goberno local cumpra estes acordos e busque unha postura unitaria, como hai lle vimos reclamando, na defensa do ensino público”

Betanzos, 27 de agosto de 2014. O BNG trasladou onte ao Pleno a petición da ANPA do Vales Villamarín unha moción para que o Concello apoie as demandas da comunidade educativa dun novo colexio para a nosa cidade e non un simple aulario como anunciou a Consellería de Educación.

Os nacionalistas reclamaron ao goberno local do PSOE que instale, no balcón da Casa Consistorial e do Edificio Arquivo, unha pancarta coa lenda ‘Cole novo, non aulario’, a petición da ANPA do colexio. “Trataríase de mostrar o apoio do Pleno da corporación as demandas da comunidade educativa e á súa defensa dun ensino público de calidade para os nosos fillos e fillas”.

O pasado mes de xullo, a instancias do BNG, o Pleno da Corporación aprobou de forma maioritaria un acordo para “instar ao goberno local a buscar a unidade de toda a veciñanza, grupos políticos e comunidade educativa para defender o ensino público de calidade na nosa cidade, que pasa por un novo colexio de educación infantil independente que acabe coa masificación do Vales Villamarín”. O acordo tamén facía referencia a “instar ao goberno local a trasladar este acordo aos Concellos da comarca, singularmente aos de Coirós e Paderne como parte da área educativa de Betanzos, para buscar o seu apoio”.

Del Río: “Lamentamos o voto en contra do PP defendendo o indefendíbel, en contra dos intereses da nosa cidade”

“No BNG entendemos que a forma de obrigar á Xunta a dar marcha atrás nesta aldraxe é ofrecer unha postura de unidade da man da comunidade escolar”, explicou Del Río, “o pasado mes de xullo pedímoslle ao goberno do PSOE que por unha vez soubese estar a á altura das circunstancias e actuase con altura de miras buscando actuacións conxuntas para enfrontar o anuncio da Xunta de reconverter o novo colexio de educación infantil nun simple aulario do CEIP Vales Villamarín”.

“A actuación do goberno do PSOE, malia apoiar a nosa proposta de levar adiante actuacións conxuntas, foi a contraria. Insistimos na necesidade de que o goberno local rectifique o seu cálculo electoralista poña por diante da súa comenencia electoral os intereses xerais da nosa veciñanza”, criticou o voceiro nacionalista.

“A decisión da Xunta chega logo de ducias de promesas e compromisos coa veciñanza de Betanzos por parte de diversos responsábeis do goberno galego e do PP. En todos eles, o PP sostivo que o novo colexio era unha realidade grazas ao seu compromiso, un compromiso que tivo que forzar a mobilización da comunidade educativa. E en todos eles, o PP, que agora o nega, falaba dun novo colexio de educación infantil”, explicou o voceiro do BNG, Henrique del Río.

“Esperamos que o PSOE no goberno local cumpra estes acordos e busque unha postura unitaria, como hai lle vimos reclamando, na defensa do ensino público”

Onte no Pleno o PSOE apoiou esta medida e o PP votou en contra das demandas da ANPA. “Lamentamos a postura do PP defendendo o indefendíbel, en contra dos intereses da nosa cidade”, criticou Del Río, “Esperamos que o PSOE no goberno local cumpra estes acordos e busque unha postura unitaria, como hai lle vimos reclamando, na defensa do ensino público na nosa cidade”.