“Cando temos 1255 veciños e veciñas sen emprego non se pode permitir a máis mínima sombra de dúbida sobre os métodos de contratación nunha administración que xestiona cartos públicos”.

Betanzos, 26 de febreiro de 2013. O BNG presentou esta mañá nunha comparecencia pública a moción de urxencia que levará ao Pleno para exixir que o goberno do PSOE presente nun mes as bases xerais de contratación de persoal. Segundo explicou o voceiro nacionalista, Henrique del Río, onte o goberno do PSOE comunicou aos grupos a súa intención de desvincularse do acordo impulsado polo BNG para aprobar unhas novas bases no Pleno e aprobar as súas bases por resolución da Alcaldía.

“Este goberno é incapaz de negociar con ninguén, nin negocia cos grupos da Corporación nin negocia unha cousa como esta co persoal municipal”, explicou o voceiro nacionalista. “Furtando este asunto ao Pleno o PSOE opta por esconderllo á veciñanza e aos traballadores municipais”, explicou o nacionalista, que recordou que o executivo do PSOE procedeu co mesmo xeito coa relación de postos de traballo (RPT) anexa ao ornamento “e así lles foi por querer sacar adiante unha ilegalidade, que ao final non saben nin eles o que aprobaron”.

O voceiro do BNG explicou que o PSOE “estivo ano e medio mareando a perdiz e perdendo o tempo a propósito co neste tema”. Denuncia que “se o goberno local se puxo coas bases de contratación foi pola nosa insistencia, xa que levamos o tema varias veces ao Pleno”. “Se o PSOE non tiña a máis mínima intención de aprobar no Pleno unhas novas bases, excusaba apoiar as mocións que presentamos nese sentido”, indicou o nacionalista. “Claro que se cadra é que tiña nalgún tipo de interese en manter a situación actual e ir aprobando as bases que lles conviña para cada praza, a pesar das ilegalidades cometidas nalgún casoe que xa denunciamos”, explicou.

Para Del Río, que compareceu acompañado da edila María Otero, “en todo momento hai que ser escrupulosísimo no que ten a ver co emprego público e a xestión dos cartos de todas e todos, pero máis aínda nun momento como o actual”. “Cando temos 1255 veciños e veciñas sen emprego non se pode permitir a máis mínima sombra de dúbida sobre os métodos de contratación nunha administración que xestiona cartos públicos”, aseguran Del Río e Otero.

“Con estes feitos, logo haberá quen se estrañe de que a veciñanza teña a imaxe que ten dos políticos e que aparezan corruptelas e demais”, advertiu. Por este motivo, os nacionalistas presentarán unha moción reclamando que se forme unha comisión cos grupos da Corporación e os representantes legais dos funcionarios e o persoal laboral municipal para presentar nun mes unhas bases xerais de contratación á aprobación do Pleno.