“Se a intención é realmente axudar e non sacar rédito político non se fai publicamente a través dos medios de comunicación”.

Betanzos, 5 de xaneiro de 2013. O BNG non participou do “torneo benéfico” organizado polas mocidades do PP porque non tivo convite oficial ao mesmo. Ademais, aínda que mediase convite formal, “o BNG non asistiría a un evento deste tipo porque o PP non cre nos servizos sociais e vai na liña de substituír un dereito como os servizos sociais por caridade ou beneficencia”, unha visión que non comparte o BNG.

Os nacionalistas aseguran que “nós non imos avalar as políticas que están destruíndo os servizos sociais e que comparten PP e PSOE”. “Os partidos que defenden un sistema que está creando grandes bolsas de pobreza e problemas, incluso, para a supervivencia das persoas agora pretenden lavar a cara facendo caridade, parécenos vergoñento”, explicaron os nacionalistas. “Se a intención é realmente axudar e non sacar rédito político non se fai publicamente a través dos medios de comunicación”, cuestionan.

“O que están facendo eses partidos aos que non lles treme a man á hora de recortar en servizos sociais, privatizar servizos básicos como a educación e a sanidade ou recortar as pensións aos anciáns é pura hipocrisía”, insistiron. “De ningunha maneira o BNG vai participar en ‘circos’ deste tipo”, aseguran os nacionalistas citando a Galeano para asegurar que "a caridade é humillante porque se exerce verticalmente e dende arriba, a solidariedade é horizontal e implica respecto mutuo".

O BNG valora o traballo das ONG e entidades que traballan nese eido, mais entenden que esta actuación sempre debe ser complementar á que desenvolvan os gobernos creando servizos públicos e garantindo os dereitos da veciñanza e non substituír aos servizos públicos.