“En maio demos a nosa palabra de defender os servizos públicos. Podiamos presentar a moción en solitario e dentro das nosas posibilidades estariamos cumprindo coa palabra dada, pero consideramos que unha moción conxunta ten moita máis forza para obrigar ao goberno do PSOE a rectificar"

Betanzos, 23 de xullo de 2015. O BNG-Asembleas Abertas remitiu onte unha proposta de moción conxunta aos outros grupos da Corporación que amosaron publicamente o seu apoio ás demandas do comité de empresa do Concello en relación ao desmantelamento do servizo municipal de limpeza. “Pensamos que é moi importante chegar a acordos para defender os servizos públicos e que unha moción conxunta tería moita máis forza e máis opcións de sair adiante” explicou o voceiro nacionalista, Henrique del Río.

“A proposta recolle o texto que nos fixo chegar o Comité de Empresa así que supoñemos que non haberá problemas para chegar a un acordo” indicou o edil do BNG-Asembleas Abertas. A situación do servizo de limpeza “ agravouse nos últimos tempos cos despedimentos de varias limpadoras, as baixas en aumento polo exceso de carga laboral en moitos casos e a modificación indiscriminada de condicións laborais sen cumprir os prazos de preaviso reflectidos na lexislación nin notificarllo nin comunicarllo aos representantes dos traballadores afectados por tales modificacións, é dicir, ao Comité de Empresa” indica na exposición de motivos, tomada do comunicado achegado pola representación das empregadas municipais aos distintos grupos da Corporación.

“Na actualidade o Concello só conta con tres traballadores de limpeza de edificios para cubrir trece edificios alonxados entre si” alerta. Por este motivo, o acordo que o BNG-Asembleas Abertas propón aos outros grupos é o de demandar ao goberno municipal “que tome medidas de inmediato que palíen o deterioro do servizo de limpeza e cubra as baixas e vacantes deste servizo para garantir a súa calidade”. “Sobra dicir que falamos de que se faga garantindo a igualdade de oportunidades para todas as persoas que queiran optar a estes empregos públicos”, indica Henrique del Río.

Do mesmo xeito, a proposta do BNG-Asembleas Abertas inclúe outro acordo no que se force ao goberno do PSOE a “manter a xestión directa dos servizos públicos e, polo tanto, a non afondar no proceso de privatización do servizo de limpeza nin de outros servizos municipais”.

“Entendemos os servizos públicos como garantía dunha mellor atención á veciñanza, máis baratos para as arcas públicas e barreira fronte a corruptelas” indicou o voceiro nacionalista, Henrique del Río. “Na campaña electoral de maio demos a nosa palabra de defender os servizos públicos e por iso mesmo propomos este acordo”, explica. “Podiamos presentar a moción e dentro das nosas posibilidades estariamos cumprindo coa palabra dada, pero consideramos que unha moción conxunta ten moita máis forza para obrigar ao goberno do PSOE a rectificar”, conclúe.