“No noso programa de goberno incluímos recuperar o uso público de todo o edificio para cederllo á Xunta e abrir alí un xeriátrico público”

Betanzos, 29 de abril de 2015. O BNG-Asembleas Abertas amosou a súa satisfacción despois de coñecer a decisión da Fiscalía de abrir unha investigación sobre as irregularidades en torno á concesión do hotel e estacionamento soterrado do Complejo San Roque. “Se a Fiscalía abre unha investigación é porque ve irregularidades neste asunto”, asegurou o candidato nacionalista, Henrique del Río. Os nacionalistas víronse obrigados a trasladar estas irregularidades ao ministerio público despois de que o goberno local do PSOE demorase o tema durante máis de 3 meses, para acabar enviándoo despois de que xa o fixera o BNG.

No noso programa de goberno incluímos recuperar o uso público de todo o edificio para cederllo á Xunta e abrir alí un xeriátrico público

“Descoñecemos se o goberno local fixo algo co acordo de recuperar o hotel que o Pleno tomou hai meses”, asegurou o nacionalista. “En todo caso, semella que por fin os veciños e veciñas imos poder saber que pasa coas concesións municipais en Betanzos” celebran desde o BNG-Asembleas Abertas. “Queda claro xa que as cousas se fixeron mal neste asunto e que vai sendo moita hora de facer as cousas ben porque se está a xogar con cartos de todas e todos”, insistiu Del Río.

Abrir un xeriátrico público no edificio

“Seguimos defendendo que se a concesionaria non paga, o Concello recupere para uso público o edificio” explicou o candidato á alcaldía de BNG-Asembleas Abertas. “No noso programa de goberno incluímos recuperar o uso público de todo o edificio para cederllo á Xunta e abrir alí un xeriátrico público” engadiu Del Río. “Desta forma, o edificio terá por fin unha utilidade social, cúbrese unha necesidade da veciñanza e cumprirase tamén a condición fixada polos herdeiros de Manuel Naveira cando legaron o antigo asilo ao Concello para uso asistencial ou cultural”, resalta.