Os nacionalistas cuestionan que o goberno local non informase deste feito aos grupos da oposición. “Temos que entender con esta actitude que o goberno está a defender uns intereses que non son os dos veciños?”

Betanzos, 28 de novembro de 2012. O BNG advertiu no Pleno de que onte ían ser suhastados a explotación do hotel e o aparcamento soterrado do asilo Manuel Naveira, en Bellavista. “O contrato subscrito entre o Concello e a empresa concesionaria é moi claro ao establecer que en caso de cambiar o titular da concesión este terá que notificarse cunha antelación mínima de 30 días e ser autorizado previamente polo Concello”, recordaron os nacionalistas.

“Por que non comunicou o alcalde estas circunstancias aos grupos da oposición?”, preguntaron desde o BNG, que entenden que unha cuestión tan importante coma esta tiña que ser trasladada aos representantes dos veciños en canto o goberno local tivese coñecemento.

Por este motivo, os nacionalistas pediron explicacións ao goberno local do PSOE sobre se o Concello fora informado desta poxa e se o goberno local e que órgano do mesmo autorizou este cambio de titularidade. “Temos que entender con esta actitude que o goberno está a defender uns intereses que non son os dos veciños?”, concluíron desde o BNG.

O voceiro do BNG, Henrique del Río, lembrou que no ano 97 o BNG votou en contra da operación que acabou co asilo en mans privadas e co polémico aparcamento soterrado da rúa Rosalía de Castro. “Ambos inmobles foron entregados a mans privadas polo PSOE por 75 anos a cambio dunha renda de 600 euros ao ano e 4 prazas de estacionamento”, recordou. “Estes son os negocios ruinosos en que meteu o PSOE ao Concello de Betanzos e á vista está como funciona o complexo”, indicou.