As nacionalistas pediron ao goberno municipal que aclare se están tramitándose autorizacións para máis fábricas no antigo aserradoiro de Talai.

Betanzos, 3 de setembro de 2015. O BNG-Asembleas Abertas volveu insistir no Pleno na necesidade de que o goberno local obrigue a axustar ruídos e emisións á normativa á factoría ubicada no núcleo de Talai. “O goberno galego respondeunos no Prlamento que garantir o cumprimento do ditame de incidencia ambiental corresponde ao Concello”, explicou o voceiro nacionalista, Henrique del Río.

A Xunta, ademais, responsabiliza ao Concello do “control da adopción e suficiencia das medidas correctoras para evitar a emisión de po e outras partículas”. “ A veciñanza de Talai trasládanos que a fabrica cando está en funcionamento segue a producir ruído e pó de forma excesiva”, explicou o edil do BNG-Asembleas Abertas.

Por este motivo, as nacionalistas reclamaron ao goberno local que exixa o cumprimento das condicións da licenza á fábrica, “para garantir o descanso e a saúde da veciñanza de Talai”. Neste sentido, demandaron ao executivo do PSOE que explique “cantas inspeccións realizou o Concello desta fábrica para garantir que cumpre o ditame de incidencia ambiental e que resultados obtivo”.

Ademais, desde o BNG-Asembleas Abertas pediron ao goberno municipal que aclare se están tramitándose autorizacións para máis fábricas no antigo aserradoiro de Talai. “Veciñas de Talai indícannos que a empresa asegurou que ampliaría a factoría”, explican.