Os nacionalistas exixen ao alcalde “que convoque de inmediato, de urxencia se é preciso, á xunta de goberno local para acordar a denuncia en vía civil porque quedan uns días para que non prescriba o dereito a cobrar a renda de 2009 e o PSOE parece que é o que pretende”

Betanzos, 5 de novembro de 2014. O BNG reclamou esta mañá toda a documentación sobre o aluguer e a concesión do hotel e estacionamento soterrado do asilo Manuel Naveira “para que a comisión de investigación que hoxe se constituíu poida desenvolver os seus traballos como é debido”. O portavoz nacionalista, Henrique del Río, advertiu de que “sen todos os documentos aos que fai referencia o último informe do secretario é imposíbel que poidamos comezar con bo pé”.

Ademais, os nacionalistas reclaman que se marque unha axenda de traballo que permita cumprir co acordado polo Pleno e “dar luz a todas as zonas escuras de este asunto, que non son poucas precisamente”.

Na comisión volveu quedar de relevo que o goberno local do PSOE non fixo nada por reclamar o pago da renda que adebeda a empresa concesionaria. “O PSOE xogou ao despiste reclamando como unha multa de tráfico o que é un alugueiro, e calquera persoa que vive de alugueiro sabe que se non paga, aos dous meses o propietario do inmóbel o denunciará por impago na vía civil”, explica Del Río. Por este motivo, desde o BNG exixen ao alcalde “que convoque de inmediato, de urxencia se é preciso, á xunta de goberno local para acordar a denuncia en vía civil”. “Quedan uns días de novembro para que non prescriba o dereito a cobrar a renda de 2009 e o PSOE parece que é o que pretende, que o Concello non poida reclamar eses cartos que son de todas e todos”, abundan.

Ademais da investigación administrativa, o Pleno acordou na súa última sesión remitir o informe completo do hotel e estacionamento soterrado á Fiscalía para investigar as posíbeis responsabilidades penais. “Se en tres meses o goberno do PSOE non remite á Fiscalía este asunto, seremos nós mesmos quen o traslademos”, engaden os nacionalistas.

“Se o Concello non vai cobrar nada, que se convirta o edificio nun local de uso público”

O BNG insistiu en reclamar ao goberno local do PSOE “que pense en favorecer a xente e non a outro tipo de intereses particulares”. Neste sentido, os nacionalistas reiteran que “se o Concello non vai ingresar nada por este edificio o normal será recuperalo como local de uso público”. “Precisamente o edificio foi cedido no seu día para albergar equipamento cultural ou asistencial, cousa que tampouco se acaba de cumprir”, engade Del Río.