“Está por ver que liña segue o PSOE, se continúa ignorando aos empregados municipais entregado á liña conservadora que lle marca CxB ou opta por aplicar as políticas alternativas que di defender alí onde non goberna”.

Betanzos, 15 de agosto de 2012. O BNG propoñerá no próximo Pleno que o Concello de Betanzos compense a paga de Nadal que o goberno central, do PP, sacou a todos os empregados públicos. Os edís nacionalistas denuncian que este tipo de decisións do goberno de Rajoy adóptanse “seguindo sen matices os ditados emanados polo FMI, o BCE ou a UE, cada vez máis pregados aos intereses do capital financeiro transnacional, ocasionan tanto unha continua perda de empregos como un empeoramento das condicións de vida das persoas que manteñen o seu emprego”.

O voceiro do BNG, Henrique del Río, asegurou que esta medida “agravará aínda máis a crise pois reducir o poder de compra das empregadas e dos empregados públicos afectará moi negativamente a pequenas e medianas empresas, ao pequeno comercio, que é un sector estratéxico para Betanzos”. “Esta medida súmase á liberalización de horarios e períodos de rebaixas, suba do IVE e mais do IRPF para os autónomos con que o PP quere acabar co pequeno comercio”, denuncia.

A medida afectará moi negativamente ao comercio, un sector estratéxico para Betanzos

Por este motivo, os edís Henrique del Río e María Otero propoñerán ao Pleno “compensar a perda do poder adquisitivo das empregadas e dos empregados públicos municipais, instando á Alcaldía e/ou Xunta de Goberno Local a que adopte as medidas necesarias para atinxir ese obxectivo”.

Segundo o BNG, hai mecanismos legais para levar adiante esta decisión, polo que dependerá da vontade política do Pleno. “Está por ver que liña segue o PSOE, se continúa ignorando aos empregados municipais entregado á liña conservadora que lle marca CxB ou opta por aplicar as políticas alternativas que di defender alí onde non goberna”, asegurou o voceiro nacionalista. O portavoz do BNG recordou que para aprobar os orzamentos “CxB exixiulle ao PSOE máis destrución de emprego público e o PSOE sumouse gustoso”.