Os nacionalistas alertaron tamén dun problema dun problema de limpeza viaria que se fai evidente pola presenza de ratas nas rúas.

Betanzos, 6 de decembro de 2012. O BNG levou ao Pleno as queixas dos veciños e veciñas da rúa do Mandeo diante das carreiras de vehículos que teñen lugar algunhas noites por esta rúa e a estrada que leva cara Obre. Segundo indicou a concelleira nacionalista María Otero, as carreiras afectan á seguridade e o descanso da veciñanza, e que ademais están a ter tamén incidencias sobre os “vehículos aparcados regulamentariamente na rúa do Mandeo”.

Diante desta situación, o BNG reclamou ao goberno local do PSOE a adopción de medidas que garantan a seguridade dos veciños e o seu dereito ao descanso. “En que prazos teñen pensado acometer estas actuacións?” exixiu coñecer a edila nacionalista.

Os nacionalistas informaron de que o goberno local do PSOE se nega a contratar persoal para a policía local tendo varias prazas vacantes, unha delas ademais con cobertura nos orzamentos que veñen de aprobar polo falecemento dun policía meses atrás. “O Alcalde negase a contratar persoal para a policía local, aínda tendo os cartos orzamentados para facelo”, explicaron os nacionalistas, “segundo di hai persoal dabondo, cando é evidente que non é así e as consecuencias estanas pagando os veciños e veciñas”.

Solicitude de campaña de desratización

Otero tamén indicou que en varios puntos da cidade a veciñanza ten manifestado a súa preocupación pola presenza de ratas nas rúas. Isto, a xuízo dos nacionalistas, evidencia un “problema de limpeza viaria” e pode supoñer un “problema hixiénico e de saúde pública”. Por este motivo, desde o BNG reclamaron ao goberno local que poña en marcha unha campaña de desratización na cidade.