“Está claro que O BNG defende os servizos públicos e o emprego de calidade, polo que estamos en contra dunha posíbel ou eventual externalización do servizo”.

Betanzos, 7 de marzo de 2012. O BNG saíu ao paso do anuncio, por parte da CIG, de accións diante do despedimento do persoal do GRUMIR. Os nacionalistas, como recorda o portavoz municipal, Henrique del Río, “xa advertimos de varias situacións e usos irregulares do GRUMIR que o goberno do PSOE non o amañou”. Neste sentido, desde o BNG recordan que un informe do secretario de xa hai tempo advirte do problema que agora se está a dar no GRUMIR.

“Era visto que ían denunciar, nós xa o advertimos”, sinalan desde o BNG. “Está claro que nós defendemos os servizos públicos e o emprego de calidade, polo que estamos en contra dunha posíbel ou eventual externalización do servizo”, asegura o voceiro nacionalista.

Porén, desde o BNG cuestionan que o PSOE mantivese nunha permanente situación de provisionalidade o GRUMIR ao longo de 20 anos. “Defendemos que se cumpra a lei de función publica no acceso ao emprego publico: igualdade, mérito e capacidade e dubidamos que no concello de Betanzos se fixera sempre así”, indica Del Río, que recorda que no pasado verán aínda o BNG tivo un enfrontamento co PSOE polos métodos de selección de persoal que empregan.