“O pasado día 6 foi o aniversario da sinatura do contrato da ORA e, dado que o goberno non acordou dalo por finalizado, coa súa inacción o PSOE permitiu unha nova prórroga”

“Levan un ano sen facer nada mentres pagamos e non vai un euro ao Concello”

Betanzos, 13 de marzo de 2015. O BNG denunciou que o pasado 6 de marzo tivo lugar unha nova prórroga tácita do contrato da ORA sen que o goberno local fixese nada para impedilo. “Nós sostemos que non hai contrato dado que a lei prohibe taxativamente as prórrogas que non se aproben de forma expresa, pero o PSOE di o contrario” explicou o voceiro do BNG, Henrique del Río. “O pasado día 6 foi o aniversario da sinatura do contrato da ORA e, dado que o goberno non acordou dalo por finalizado, coa súa inacción o PSOE permitiu unha nova prórroga”, explicou.

“En febreiro e abril o Pleno debateu unha moción nosa para suprimir a ORA dado que non ingresa nada ao Concello desde hai anos” recordou o edil nacionalista. “E en decembro volvemos preguntar porque a única explicación que dera o PSOE era que estaban contando ‘ticket a ticket’ a recadación dos últimos anos”, engade. “A empresa concesionaria non ingresou un só euro no concello desde hai 7 anos e o Concello non fai nada para obrigarlle a pagar. Se fose un veciño xa lle terían embargado a conta”, criticou o portavoz do BNG.

“Vai xa practicamente un ano desde que denunciamos a situación desta concesión e non se adoptou ningún tipo de medida para corrixila”, engade. “O que é peor, o goberno do PSOE mareou a perdiz todo un ano para manter esta situación, que a veciñanza siga pagando cada vez que aparca na zona azul e non vai nada para o Concello” lamentou.

Levan un ano sen facer nada mentres pagamos e non vai un euro ao Concello

“E non entendemos que o goberno local non só se resistise durante un ano a tomar inmediatamente as medidas necesarias para impedir que a concesionaria siga cobrando sen contrato en concepto de ORA senón que coa súa falta de acción permita que esta situación se manteña cando menos un ano máis”, engaden desde o BNG.

“Desde logo, parece evidente xa a estas alturas que neste asunto o PSOE non está defendendo os intereses da veciñanza, polo que terá que explicar ás claras a que xoga”, engaden os nacionalistas. “A veciñanza merece unha explicación pública por parte do goberno sobre todo isto”, advertiu Del Río para exixir que o goberno explicase publicamente o asunto.

Os nacionalistas insisten en que a supresión da ORA sería unha medida beneficiosa para o pequeno comercio xa que “mentres que as grandes superficies dan estacionamento gratuíto, para vir mercar a Betanzos hai que pagar por aparcar”.