“Pedímoslle ao goberno local do PSOE que rectifique a súa negativa dos últimos dous meses, que sexa responsábel e non rexeite esta solución só porque a propón o BNG-Asembleas Abertas, que pensen no persoal ao que exixe xornadas de máis de dez horas e que pense nas crianzas que acuden a diario a San Francisco”

Betanzos, 20 de novembro de 2015. O BNG-Asembleas Abertas pedirá outra vez no Pleno que se cubran de inmediato as baixas na escola infantil municipal. “A Inspección de Menores acaba de exixirlle ao goberno local que tome as medidas necesarias para restablecer o número legal de alumnado por aula e docente”, explica o voceiro nacionalista, Henrique del Río.

“Ningunha disposición legal impide cubrir as baixas con contratos laborais de carácter temporal, acotando a súa duración á resolución definitiva do proceso selectivo actualmente en marcha”, advirten as nacionalistas. Esta medida provisoria permitiría cubrir “con carácter provisorio e urxente” as baixas actualmente existentes na escola infantil e prestar o servizo cos mínimos de calidade que a lexislación establece.

“Estamos poñendo enriba da mesa unha solución á situación excepcional que atravesa a escola infantil municipal e pedímoslle ao goberno local do PSOE que rectifique a súa negativa dos últimos dous meses” relata Del Río. “Pedímoslle ao PSOE que sexa responsábel e non rexeite esta solución só porque a propón o BNG-Asembleas Abertas, que pensen no persoal ao que exixe xornadas de máis de dez horas e que pense nas crianzas que acuden a diario a San Francisco”, engade.

“Sabemos que hai queixas e reclamacións de pais e nais pola situación límite que atravesa a escola infantil”, explicou a nacionalista María Bonome. Desde o BNG-Asembleas Abertas, que mantiveron onte unha xuntanza con persoal da escola infantil, aseguran que o goberno local non pode ignorar as demandas dos pais e nais e facer como se non existisen.

“Mesmo hai proxenitores que pediron ampliar horario de escolarización dos seus fillos e non se lles concede porque non hai persoal abondo”, relatan. Indican que mantendo esta situación o goberno local do PSOE complica a conciliación da vida persoal e familiar á veciñanza.