“Non se pode predicar unha cousa en Santiago e facer outra en Betanzos, ou incluso posicionarse nun sentido no Pleno e despois facer na practica o contrario”, insistiu del Rio, quen pediu ao goberno local do PSOE “un pouco de coherencia nas súas actuacións”.

Betanzos, 30 de marzo de 2012. O BNG denunciou esta mañá a privatización da escola infantil do Carregal. Cunha faixa co lema “Ensino público e de calidade. Os nosos impostos, ao servizo das persoas” representantes do BNG da comarca e veciños de Betanzos aproveitaron a visita de Feijoo para manifestar a súa oposición á privatización escola infantil pública de Betanzos.

O portavoz municipal do BNG, Henrique del Río, lembrou que “o PP entregou un edificio levantado en terreos municipais e cos impostos de todos a unha empresa privada para que faga negocio coa educación dos meniños”. O voceiro nacionalista insistiu, ademais, en que a Xunta do PP subiu as taxas da rede pública de escolas infantís “para convertelas nun bocado atractivo para a empresa privada” ao pasar “de 110 euros a 160 na atención educativa”. Os nacionalistas denuncian que no servizo de comedor, o PP promoveu “unha suba do 112% ao pasar de 33 a 70 euros”, e lamentan que a voceira do PP, María Faraldo, cualificase o servizo de comedor coma “un servizo voluntario e a maiores” no debate plenario da moción do BNG contra a privatización da escola infantil, moción que saíu adiante so co voto en contra do PP.

Os nacionalistas lamentan que o goberno local non tomase ningunha medida efectiva para facer valer o carácter público da escola infantil, tal e como acordou o Pleno do Concello, co apoio do PSOE. Censuran, ademais, que hoxe o executivo do PSOE acudise “en pleno” a “rirlle a Feijóo a ocorrencia de privatizar o centro”. Para o voceiro do BNG, Henrique del Río, “vai sendo moita hora de que o alcalde aclare se vai retirar a Betanzos do Consorcio de Benestar, como anunciou o PSOE que farían todos os seus alcaldes”. “Non se pode predicar unha cousa en Santiago e facer outra en Betanzos, ou incluso posicionarse nun sentido no Pleno e despois facer na practica o contrario”, insistiu del Río, quen pediu ao goberno local do PSOE “un pouco de coherencia nas súas actuacións”.