“A gran maioría dos concellos da comarca teñen orzamentos aprobados, como a legalidade exixe, sen esperar as eleccións andaluzas e o orzamento de Rajoy. Esperamos que agora, por fin, o goberno do PSOE se tome en serio a aprobación do orzamento en Betanzos”.

Betanzos, 4 de abril de 2012. O BNG denunciou a irresponsabilidade do goberno do PSOE por non ter ningún interese en aprobar un orzamento. Os nacionalistas reprochan que o executivo local aínda enviou esta semana ao BNG un documento incompleto para iniciar as negociacións do orzamento.

“O BNG deixou moi claro en xaneiro que o orzamento tiña que ser elaborado de xeito participativo”, indica o portavoz municipal do BNG, Henrique del Río. Os nacionalistas lamentan que o PSOE non só non recollese as suxestións veciñais senón que actuou “con total falta de transparencia con respecto a este tema”.

Neste sentido, o BNG critica o anuncio feito polo goberno local o pasado 3 de marzo, co apoio de CxB, para adiar a concreción dun borrador até que estivesen aprobados os orzamentos do Estado. “A gran maioría dos concellos da comarca teñen orzamentos aprobados, como a legalidade exixe, sen esperar as eleccións andaluzas e o orzamento de Rajoy”, ironiza Del Río. “Esperamos que agora, por fin, o goberno do PSOE se tome en serio a aprobación do orzamento en Betanzos”, conclúe.

Unha proposta que empeora os problemas do persoal do Concello

O goberno do PSOE achegou co borrador dos orzamentos unha proposta de modificación da relación de postos de traballo. No informe xurídico que acompaña o documento, o propio secretario recoñece que a selección do persoal municipal “aínda que na maioría dos casos se fixo baixo criterios de igualdade, mérito, capacidade e publicidade, non se cumpriu con todos os requisitos dunha oferta de emprego público”. Isto ven a recoñecer que non se cumpriu coa lexislación vixente á hora de contratar o persoal laboral, que segue sendo persoal temporal logo de vinte anos.

A proposta recolle xa a supresión dos contratos dos operarios do GRUMIR, segundo o goberno local, por non poder mantelos sen a subvención da Xunta. Porén, mantéñense as tres prazas de encargado e xefes de grupo do GRUMIR. “Sobre quen van a mandar?” pregúntase Del Río. Os operarios do GRUMIR xa anunciaron que levarán aos tribunais estes despedimentos por considerar que teñen dereito a ser recoñecidos como traballadores fixos logo de estar nunha situación de provisionalidade durante 20 anos. “O Concello vai gastar un lote de cartos en pleitear contra traballadores por facer as cousas mal durante anos”, censuran os nacionalistas.