Os orzamentos da Xunta, unha nova desilusión para as betanceiras
Estes orzamentos marcan unha liña de continuidade e demostran a carencia de proxecto e de ilusión dun goberno esgotado, que pouco pode ofrecer xa aos betanceiros e betanceiras
Un ano máis, a Xunta de Galiza fixo públicos con foguetes de sete estralos os seus orzamentos para 2024. Inmersos de cheo na campaña electoral, anuncian investimentos e servizos que, unha vez máis, esquecen por completo Betanzos e a comarca das Mariñas.
Ao longo dos últimos anos, a veciñanza de Betanzos vén reclamando de maneira insistente investimentos en cuestións sociais de importancia crucial como a mellora das instalacións do comedor e a segunda fase da reforma do CEIP Vales Villamarín; a conversión do aulario nun centro independente: a creación dun centro de información á muller ou dun centro de orientación familiar; ou a moi necesaria posta en funcionamento dos ansiados centro de día e xeriátrico públicos.
Un ano máis, os orzamentos da Xunta esquecen o investimento social na nosa comarca e deixan os sectores vulnerábeis sen as partidas económicas necesarias para mellorar a súa calidade de vida.
Os servizos públicos básicos nin foron nin serán unha prioridade para este goberno, como así demostra a falta de fondos para dotar dos especialistas necesarios o noso centro de especialidades ou para mellorar o maltreito servizo de transporte colectivo.
Da falta de proxecto e de iniciativa destes orzamentos dá proba o feito de que adíen un ano máis a solución ao grave problema de contaminación que padecen os nosos ríos e a ría de Betanzos, e que vimos este verán cos problemas da auga potábel. Necesitamos uns ríos e unha ría saneados que volvan ser un motor económico e, asemade, que garantan a salubridade do servizo de abastecemento de augas.
E se falamos do que debería ser o noso motor económico, insistimos na importancia da conservación e posta en valor do noso patrimonio, que o PP ten abandonado. Só unha referencia a unha reserva para obras de mellora no Pasatempo dentro dunha partida xenérica de obras relacionadas co turismo, mais esquecen a conservación e posta en valor doutro patrimonio protexido e a piques de desaparecer como a Fábrica da Luz ou o Casco Histórico.
Estes orzamentos marcan unha liña de continuidade e demostran a carencia de proxecto e de ilusión dun goberno esgotado, que pouco pode ofrecer xa aos betanceiros e betanceiras. Cómpre reactivar unha comarca altamente produtiva como esta e por iso precisamos un proxecto propio dun goberno galego capaz de xerar ilusión na veciñanza. No BNG estamos seguras de que podemos facelo.
