“Nin o PSOE nin o PP tiveron nunca interese real en facer do noso patrimonio un activo económico para o crecemento da nosa cidade”.

Betanzos, 17 de outubro de 2012. O BNG acusou á Xunta de intentar enganar á xente coa colocación da sinalización do albergue de peregrinos. “Logo de castigar catro anos a Betanzos sen esta infraestrutura, o PP coloca na campaña os indicadores do albergue para aparentar que fixeron algo”, indicou o voceiro nacionalista, Henrique del Río.

“Por sectarismo o PP paralizou as obras en canto chegou á Xunta e o resultado é que castigaron a Betanzos sen o albergue”, resume o edil do BNG e candidato ao Parlamento de Galiza. “Ademais, o PP desde o goberno local enganou varias veces á xente fixando datas para a apertura que nunca se cumpriron”, lembra o voceiro nacionalista. “María Faraldo e Núñez Feijóo son en última instancia os responsábeis de que o albergue non abrira aínda as súas portas”, asegurou. Os nacionalistas aseguran que esta actuación do PP provocou, ademais, malestar nos potenciais usuarios do albergue, que o atopan pechado.

“Ás portas da campaña a Xunta do PP puxo indicadores do albergue para enganar á xente, aparentando que estaba acabado”, cuestiona o voceiro do BNG. “Porque logo dun ano coa obra finalizada sería escandaloso inaugurala”, ironizou. “Esta é a maneira normal de actuar do PP promesas en campaña electoral que despois nunca se chegan a cumprir. Todos recordamos a rehabilitación do Casco Histórico que prometeron na campaña electoral das municipais e as casas que mercou a Xunta e que agora están igual que cando as adquiriron porque só orzamentaron 3000 euros para todas as rehabilitacións”.

“Na situación de terríbel crise económica na que estamos vivindo, e cos datos de desemprego de Betanzos, no BNG o que percibimos e que non hai ningún tipo de preocupación nin no goberno local do PSOE nin no goberno da Xunta do PP por dinamizar un sector que debera ser o maior activo económico da nosa cidade como é o sector turístico”, explicou Henrique del Río, voceiro do BNG. “O PSOE ten totalmente abandonado este sector, tanto desde o punto de vista da dinamización como na conservación”, engadiu, “e neste sentido todos vemos o estado lamentábel que presenta o parque do Pasatempo”.

“Nin o PSOE nin o PP tiveron nunca interese real en facer do noso patrimonio un activo económico para o crecemento da nosa cidade”, concluiu Del Río.