Propoñemos facer un centro de interpretación no Pasatempo con cargo ao plan de obras da Deputación

Un acto do BNG no Pasatempo
Un acto do BNG no Pasatempo

As nacionalistas avogan por construír pequenas depuradoras ecolóxicas a base de brañas artificiais nas aldeas sen saneamento. Melloras na escola infantil municipal e os locais de ensaio de Bellavista son outras das propostas.

Propoñemos facer un centro de interpretación no Pasatempo con cargo ao plan de obras da Deputación

As nacionalistas avogan por construír pequenas depuradoras ecolóxicas a base de brañas artificiais nas aldeas sen saneamento. Melloras na escola infantil municipal e os locais de ensaio de Bellavista son outras das propostas.

Betanzos, 4 de novembro de 2016. O BNG presentou esta mañá as súas propostas de investimento para os distintos plans de obras que a Deputación financiará en Betanzos. As actuacións propostas polas nacionalistas inclúen a mellora de servizos que actualmente empresta o Concello e unha aposta pola posta en valor do patrimonio como oportunidade de desenvolvemento para a cidade.

Neste sentido, o BNG propón mellorar os locais de ensaio de Bellavista, amañando as deficiencias actuais en canto a impermeabilización, insonorización e seguridade. Complementariamente, proponse a adquisición de equipamento audiovisual portátil para o Cine Alfonsetti, que sirva para organizar eventos noutras dependencias municipais que tampouco contan con estes medios. “Con este lote estamos facilitando alternativas de lecer e levar as actividades culturais a todos os barrios e parroquias”, explica Henrique del Río, voceiro do BNG.

Outra das propostas do BNG é destinar parte destes plans de obras a ampliar a rede de saneamento. As nacionalistas avogan por construír pequenas depuradoras ecolóxicas a base de brañas artificiais. “Ten menos custo de obra e mantemento que unha depuradora convencional, non precisa consumo eléctrico nin grandes canalizacións ou bombeos, polo que sae moito máis barato para sanear os núcleos rurais que non teñen sumidoiros”, explica o portavoz municipal do BNG.

As nacionalistas propoñen, ademais, redeseñar o patio traseiro da escola infantil municipal de San Francisco, suprimindo a piscina de area, renovando os aseos e transformando a zona nun patio cuberto onde, ademais, se poidan deixar os carriños no que as crianzas están no centro. “É unha proposta que xa fixemos o pasado ano, recollida das propias docentes e nais do alumnado, que esperamos que este ano sexa tida en conta para mellorar un servizo que se usa a diario”, explica o edil do BNG.

Investimento no Casco Histórico

No Casco Histórico o BNG propón continuar renovando servizos e pavimentacións, para revalorizar a zona monumental. Así, propoñen intervir no primeiro tramo da rúa Nova e nas venelas dos Clérigos. Ademais, a imaxe doutras cidades europeas, as nacionalistas propoñen a adquisición de lonas decoradas para cubrir os solares en ruínas do Casco Histórico. “Trátase de ofrecer os mesmos servizos que na zona nova e de facer atractivo centro histórico, como atracción turística e para captar investimento”, explican.

Posta en valor do patrimonio: centro de interpretación do Pasatempo

O BNG propón dúas actuacións para poñer en valor o patrimonio que Betanzos ten fóra do Casco Histórico. Unha delas, a posta en valor e rehabilitación da fonte dos Cabalos e acceso ao recinto da Feira Nova desde o Campo. A fonte, fronte a Correos, está moi deteriorada e oculta entre colectores do lixo e vehículos mal estacionados. “É unha actuación modesta que recuperaría unha fonte centenaria e daría valor a esta zona”, explica Del Río.

Ademais, o BNG propón reacondicionar o baixo da grada do auditorio do Pasatempo como un centro de interpretación do parque enciclopédico. “Non hai nada que explique aos visitantes como e por que aparece o Pasatempo e no proxecto de 1,3 millóns presentado polo goberno local tampouco está prevista a posta en valor e divulgación do recinto, só a reconstrución do que queda”, explica Del Río. “Cremos importante dar no propio recinto unha imaxe do que foi, de cómo se construíu, de por que se perdeu e de cómo se recuperou o que aínda queda”, relata. Neste sentido, as nacionalistas demandan ao executivo local que faga público o proxecto para o Pasatempo que presentou en setembro.