“O PP está creando un intermediario ao trasladar esta responsabilidade ás Deputacións para dotalas de contido ante unha opinión pública que exixe a súa desaparición”.

Betanzos, 25 de abril de 2012. O BNG denunciou no pleno o “desmantelamento dos servizos sociais por parte da Xunta do PP”. O portavoz municipal do BNG, Henrique del Río, acusou ao PP de “abandonar as competencias da Xunta e impoñerllas, por decreto e sen financiamento aos Concellos”.

Os nacionalistas cuestionan que a Xunta traslade o financiamento do servizo de asistencia no fogar ás Deputacións, “sen fixar cantidades nin porcentaxes concretas de forma que colaborarán o mesmo achegando un euro que cen mil”, resumiu graficamente Del Río.

Incremento do copagamento e incidencia na destrución de emprego

O decreto 99/2012 aprobado pola Xunta de Galiza supoñerá, ademais, que os concellos teñan que incrementar os fondos que destinan ao servizo de axuda no fogar porque o goberno galego reduce a súa asignación. “Ademais, exixe un incremento do co-pagamento por parte das persoas usuarias”, denuncia o voceiro nacionalista, que considera que “non son estas persoas as que teñen que soportar o custo da crise”, senon que “o xusto é que pague máis quen máis ten”. “As medidas da Xunta poden significar que moitos concellos opten por deixar de emprestar o servizo e polo tanto tamén terán unha incidencia no incremento do paro”, advirte.

O mantemento do servizo de axuda no fogar pasa por comarcalizalo

Para o BNG “o PP está creando un intermediario ao trasladar esta responsabilidade ás Deputacións para dotalas de contido ante unha opinión pública que exixe a súa desaparición”. “Baleiran de competencias ao goberno galego dentro da recentralización que está a levar o PP desde o goberno central”, denuncia o BNG.

“Os concellos de menos de 20 000 habitantes quedarán sen fondos para a asistencia no fogar básica”, indicou Del Río, que entende que “a alternativa pasa pola comarcalización do servizo, como propón o BNG”. A medida, segundo os nacionalistas, vai detrás da redución de fondos do plan concertado de servizos sociais que a Xunta do PP decidiu en novembro, ao pasar de 31254,64 euros a cantidade que percibiu Betanzos en 2010 aos 4121 do 2011, “un recorte do 87%”, indican.