Pedimos ao goberno local que aclare se mantivo algún tipo de conversa cos Núñez para pechar a proposta que presentou no Pleno o pasado martes

Casa Núñez, deseñada por González Villar, sede da fundacióN CIEC
Casa Núñez, deseñada por González Villar, sede da fundacióN CIEC

“Parvas seriamos se non valorasemos que unha entidade coa valía artística, cultural e patrimonial do CIEC teña en Betanzos a súa sé e imparta aquí toda a súa programación formativa, mais isto non impide que botemos en falta un maior vínculo da entidade coa cultura do país e un control público, dado que a maior parte dos fondos para constituíla foron achegados precisamente polo Concello”

Pedimos ao goberno local que aclare se mantivo algún tipo de conversa cos Núñez para pechar a proposta que presentou no Pleno o pasado martes

“Parvas seriamos se non valorasemos que unha entidade coa valía artística, cultural e patrimonial do CIEC teña en Betanzos a súa sé e imparta aquí toda a súa programación formativa, mais isto non impide que botemos en falta un maior vínculo da entidade coa cultura do país e un control público, dado que a maior parte dos fondos para constituíla foron achegados precisamente polo Concello”

Betanzos, 27 de abril de 2018. O BNG pediu ao goberno local que aclare se mantivo algún tipo de conversa cos Núñez para pechar a proposta que o presidente da Fundación CIEC presentou no Pleno o pasado martes. “O goberno local está collendo por norma agachar á Corporación, que é quen representa ao pobo da cidade de Betanzos, a súa actuación en temas que afectan gravemente a toda a veciñanza e mesmo á estabilidade futura do Concello como Administración”, reproba o voceiro do BNG, Henrique del Río.

“Temos constituídas unha ducia de comisións, ademais de reunirnos na xunta de voceiros e noutro tipo de foros, que convocan case semanalmente para darnos conta de asuntos menores, sen trascendencia para o Concello ou os servizos básicos pero para as cousas de calado como esta non só non se nos convoca, senón que mesmo se nos furta calquera tipo de información”, indica o edil nacionalista. “E a Corporación é a representación da veciñanza”, remarca.

Neste sentido, desde o BNG demandan que se faga público se a proposta presentada no Pleno é o resultado dunha negociación do goberno local cos propietarios da entidade. “E que a secretaría e a intervención informen as consecuencias que pode ter para o Concello asumir esta proposta con todo detalle”, engade.

“Non estaría de máis que o alcalde informase tamén se a Fundación CIEC o convoca ou non aos padroados, xa que o Concello está representado alí por medio del, e dos acordos que adoptou no seo dese organismo”, explica. “Porque do papel que xoga o Concello nunha entidade na que puxo no seu día o 70% do capital fundacional aínda hoxe, 20 anos despois, non se informou nin unha liña a todas as Corporacións que existiron”, engade. “E isto, obviamente, é moi grave”, sostén.

As nacionalistas lembran que a Fundación constituíuse cun capital inicial de 10 762 424 pesetas, das que Jesús Núñez achegou o 30,19% e o Concello o restante 69,80%, segundo a escritura notarial, unhas  7 512 424 pesetas do ano 1997, que virían sendo uns 68.222,47 € de hoxe (segundo a aplicación para actualización de rendas do INE). “Porén, malia ser a principal achega a municipal, o Concello ten un voto no padroado, por 7 votos de integrantes da familia de Jesús Núñez” explican.

“Parvas seriamos se non valorasemos que unha entidade con esta valía artística, cultural e patrimonial teña en Betanzos a súa sé e imparta aquí toda a súa programación formativa” explica o voceiro do BNG, que salienta que está “fóra de cuestión a valía artística do creador da entidade”. “Mais canto antecede non empece que botemos en falta un maior vínculo da entidade coa cultura do país, coa cultura de base, e un control público dado que a maior parte dos fondos para constituíla foron achegados precisamente polo Concello”, puntualiza. “Cremos que debera ter un papel moito máis importante na dinamización cultural de Betanzos e As Mariñas, un proxecto cultural que abra a entidade ao país” explican.